(ភ្នំពេញ)៖ ក្រសួងសុខាភិបាល នៅព្រឹកថ្ងៃទី១២ ខែមេសា ឆ្នាំ២០២១នេះ បានចេញសេចក្តីប្រកាសព័ត៌មាន បញ្ជាក់ពីការបន្តរកឃើញអ្នកឆ្លងកូវីដ១៩ ថ្មីរហូតដល់២៧៧នាក់ថែមទៀត ដែលភាគច្រើនបំផុតជាអ្នករស់នៅរាជធានីភ្នំពេញ ខណៈអ្នកជំងឺចំនួន៦០នាក់បានជាសះស្បើយ និងអនុញ្ញាតឲ្យចេញពីមន្ទីរពេទ្យ។

សេចក្តីប្រកាសព័ត៌មានបានបញ្ជាក់ថា អ្នកឆ្លងទាំង២៧៧នាក់ គឺសុទ្ធសឹងជាករណីឆ្លងក្នុងសហគមន៍២០កុម្ភៈ ដែលរួមមានរាជធានីភ្នំពេញ ២០៤នាក់, ខេត្តតាកែវ ១នាក់, ខេត្តព្រៃវែង ២នាក់, ខេត្តពោធិ៍សាត់ ៣នាក់, ខេត្តកណ្តាល ២៣នាក់ និងខេត្តស្វាយរៀង ៤៣នាក់។

មានអ្នកធ្វើដំណើរមកពីក្រៅប្រទេសម្នាក់ក្នុងចំណោមអ្នកជាសះស្បើយទាំង៦០នាក់ដែលជាអ្នកឆ្លងក្នុងព្រឹត្តិការណ៍សហគមន៍ ២០កុម្ភៈ។ តាមការបញ្ជាក់ពីប្រកាសព័ត៌មានរបស់ក្រសួងសុខាភិបាល គឺអ្នកជាសះស្បើយបាន ទទួលទ្ធផលធ្វើតេស្តអវិជ្ជមាន២លើក មុនអនុញ្ញាតឲ្យចេញពីមន្ទីរពេទ្យ ប៉ុន្តែត្រូវបន្តធ្វើចត្តាឡីស័ក១៤ថ្ងៃ ដើម្បីតាមដានសុខភាព។

សូមជម្រាបថា គិតត្រឹមម៉ោង៧ព្រឹក ថ្ងៃទី១២ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងសរុបចំនួន ៤៥១៥នាក់ ក្នុងនោះករណីសហគមន៍២០កុម្ភៈ ចំនួន ៣ ៩៨២នាក់, អ្នកជាសះស្បើយចំនួន ២២១២នាក់, អ្នកកំពុងសម្រាកព្យាបាលចំនួន ២២៦៨នាក់, អ្នកស្លាប់ចំនួន ៣០នាក់ និងស្លាប់ដោយជំងឺផ្សេង ពេលកំពុងព្យាបាលកូវីដ១៩ចំនួន ៥នាក់៕